महाराष्ट्र पोरका झाला! धडाडीचा लोकनेता 'दादा' काळाच्या पडद्याआड..

आजचा दिवस, २८ जानेवारी २०२६, महाराष्ट्राच्या राजकीय इतिहासातील एक अत्यंत 'काळा दिवस' म्हणून कोरला जाईल. राज्याचे उपमुख्यमंत्री आणि कार्यक्षम नेतृत्व अजितदादा पवार यांचे बारामती (पुणे) येथे झालेल्या एका भीषण विमान अपघातात निधन झाले. या धक्क्याने संपूर्ण महाराष्ट्र शोकसागरात बुडाला आहे.

अपघाताचा थरार:
मिळालेल्या माहितीनुसार, अजित पवार यांचे विमान बारामती येथे लँडिंग करत असताना हा अपघात घडला. लँडिंगचा पहिला प्रयत्न अयशस्वी झाला होता. त्यानंतर वैमानिकाने दुसऱ्यांदा लँडिंगचा प्रयत्न केला, मात्र हे 'क्रॅश लँडिंग' ठरले. विमान जमिनीवर आदळताच मोठा स्फोट झाला आणि या भीषण दुर्घटनेत महाराष्ट्राचा एक पहाडी आवाज शांत झाला.

विक्रमी आणि झंझावाती कारकीर्द:
अजित पवार यांच्या नावावर अनेक राजकीय विक्रमांची नोंद आहे. महाराष्ट्र राज्याचे उपमुख्यमंत्री म्हणून ६ वेळा शपथ घेण्याचा विक्रम त्यांनी प्रस्थापित केला होता. राष्ट्रवादी काँग्रेसचे सर्वेसर्वा श्री. शरदचंद्र पवार यांचे सख्खे पुतणे असलेल्या दादांनी आपल्या कामाच्या जोरावर स्वतःची वेगळी ओळख निर्माण केली होती. राज्याचे अर्थखाते सांभाळताना त्यांनी शिस्त आणि विकास यांचा सुवर्णमध्य साधला होता.

स्पष्टवक्ता आणि कामाचा माणूस:
अजितदादा म्हणजे 'स्पष्ट आणि रोखठोक' स्वभाव. जे पोटात तेच ओठात, अशी त्यांची ख्याती होती. "भल्या पहाटे उठून कामाला लागणारा लोकनेता" ही त्यांची ओळख महाराष्ट्राच्या घराघरांत पोहोचली होती. मराठी माणसाच्या प्रश्नांवर थेट भूमिका घेणारा, प्रशासनावर जरब बसवणारा आणि मिश्किल शैलीत समोरच्याला निरुत्तर करणारा हा जननेता काळाच्या पडद्यामागे निघून गेला, ही खंत महाराष्ट्र कधीही विसरणार नाही.

राजकारणातील एक कार्यक्षम 'पॉवर हाऊस' आज शांत झाले आहे. त्यांच्या निधनाने महाराष्ट्राच्या सार्वजनिक जीवनात कधीही भरून न निघणारी पोकळी निर्माण झाली आहे.

दिवंगत उपमुख्यमंत्री अजित पवार दादा यांना सहृदय भावपूर्ण श्रद्धांजली!